A entrada en vigor do Plan CooperOu, que reparte os fondos da Deputación de Ourense entre os municipios da provincia con criterios obxectivos, supón para o Concello de Vilardevós poder cuadriplicar a súa capacidade de investimento. Antes percibía apenas 77.000 euros anuais da institución provincial; despois das dúas modificacións de crédito que o PSdeG-PSOE negociou co grupo de goberno do PP, vai recibir un total de 303.742 euros anuais.
Deputadas do Grupo Provincial Socialista visitaron Vilardevós para avaliar, en compañía da súa alcaldesa, o impacto que supón no municipio a aplicación do plan CooperOu). "Este ano cambiou moito a financiación que provén da Deputación polo traballo do PSdeG-PSOE, sendo capaces as compañeiras e compañeiros de loitar por este Plan que supón unha revolución para a provincia e, por suposto, para o noso concello", apunta Eva Pérez Gamote. Con ela estaban Elvira Lama, Marina Vaz, e Marina Lovelace.
Un exemplo deste impacto é Rexosende, onde se están a levar a cabo os traballos de reparación do centro social grazas aos fondos do CooperOu. Pero non é o único, en Soutochao e Vilardevós tamén se están a desenvolver actuacións grazas ás achegas do devandito Plan. "Ao contrario do que pasaba antes, agora repartimos en función do que os veciños van demandando, das urxencias e necesidades que realmente temos", salientaba Eva Pérez.
Criterios obxectivos no reparto dos fondos
"Sendo una reivindicación socialista de longa data, na que non deixamos de insistir e loitar, por fin neste 2024 a Deputación provincial do PP rendeuse á evidencia de que non podía ser a única das galegas que non tiña un plan de cooperación cos concellos baseado nun reparto de fondos segundo criterios obxectivos", explica a deputada provincial Elvira Lama.
Tal e como salienta Lama: "Amais da importancia de poder levar a cabo proxectos necesarios para a veciñanza, a implementación do plan único permítenos saber os recursos que lle tocan a cada concello para vindeiros exercicios, podendo planificar o mellor xeito de investir os cartos que chegan da Deputación".