Evento
AXENDA | As xornadas sobre Eloy Luis André analizarán a traxectoria do intelectual verinés
O Consello da Cultura Galega, en colaboración coa Biblioteca do Concello de Verín, organizan un ciclo de actividades dedicadas á figura de D. Eloy Luis André, un dos máis relevantes intelectuais galegos, escritor, pensador e introdutor da psicoloxía moderna en España.
A figura de Eloy Luis André será presentada e analizada por especialistas de recoñecido prestixio que achegarán unha visión única sobre o pensamento e legado do autor, afondando en aspectos como a psicoloxía, o europeísmo, o galeguismo, as comunicacións terrestres e o estudo da fala. Nado en Mourazos en 1876 e falecido en Madrid en 1935, a súa traxectoria será revisada dende múltiples enfoques nun ciclo de conferencias ao longo do mes de outubro.
As xornadas compleméntanse coa exposición "Silencio, soidade, carácter", en homenaxe ao artigo homónimo de Eloy Luis André, publicado en 1907 na revista Sagitario. A mostra, comisariada por Aurora Prieto, Miguel Losada e Vicente R. Justo, percorre algúns dos momentos máis relevantes da vida e obra do autor. Poderá verse na Biblioteca Municipal de Verín ata o 31 de outubro.
Programa do ciclo de conferencias
Os relatorios desenvolveranse todos os xoves do mes de outubro ás 19:30h no Salón de Actos da Casa da Cultura do Concello de Verín.
- 3 de outubro: "Psicoloxía: cambio social e perfección persoal", de Xosé Ramón García Soto.
- 10 de outubro: "A variante André: europeísmo, españolismo, galeguismo", de Ramón López Vázquez.
- 17 de outubro: "A visión estratéxica das comunicacións terrestres de Eloy Luis André", de Alberte Blanco Casal.
- 24 de outubro: "Descubrindo as curvas melódicas da fala", con Aurora Prieto, Miguel Losada, Vicente R. Justo e Xosé Ramón García Soto.
- 31 de outubro: "Tras o lume: esquecementos e lembranzas" Carlos Thiébaut.