Somentes un día despois da manifestación celebrada en Verín reclamando a mellora do Servizo de Pediatría para a bisbarra, cunha alta participación cidadá, dende o SERGAS informan sobre a evolución das obras do Hospital. Semella que o berro conxunto da veciñanza de Verín para que podamos ter unha atención sanitaria de calidade para as nenas e os nenos da comarca, e retomando aquel "Verín non se pecha", chegou ata Ourense e dende a Xerencia da Área Sanitaria queren manternos ben informados. Ata en domingo.
Non vai ser ista redacción quen prive ás nosas veciñas e ós noso veciños do que acontece nas obras do Hospital de Verín. Nembargantes, semella que para a Xunta de Galicia é máis importante o feito de poñer paneis fotovoltaicos no teito do Hospital que o de dar solución a unha mala xestión do Servizo de Pediatría. A idea é boa, hai que mellorar a eficiencia enerxética dos edificios públicos. Pero, se cadra, éranos mellor ter máis pediatras e, se temos solucionado o primordial, imos mellorando todo o demais.
O caso é que "As obras de ampliación e mellora do Hospital de Verín continúan a bo ritmo", afirman dende o SERGAS, "coa instalación na cuberta de parte dos 650 paneis fotovoltaicos previstos". Non sabemos que significa, exactamente, "a bo ritmo", xa que a previsión de plazos fala de "un horizonte de once meses". Tamén descoñecemos, exactamente, que parte dos 650 paneis fotovoltaicos xa están instalados.
Certo é que "tamén se situarán no novo edificio de urxencias". Ai, o novo edificio de urxencias... case parece un soño o de ter unhas Urxencias Hospitalarias sen ter que subir isa costiña tan boa que temos dende hai tres décadas. A veciñanza diste distrito sanitario agarda con ansia e anhelo ver alzado o novo edificio. "De planta baixa e conectado ao resto do hospital, o novo edificio mellorará a accesibilidade das urxencias da poboación da bisbarra", explican dende a Área Sanitaria de Ourense. Non era sen tempo que alguén se decatara do nefasto acceso que existe ata o de agora.
Estamos tranquilos porque "avanzan os traballos de construción do novo edificio, de 1.488 metros cadrados, co hormigonado da cimentación desta ampla e moderna extensión; aumentando ademais o espazo dispoñible para a atención sanitaria". No deseño quixeron incluír certos extras, xa que "disporá dun acceso exclusivo, cunha área de acceso de vehículos, para recoller ou achegar pacientes, e estacionamento propio".
E, como será o novo edificio de Urxencias? Na entrada situarase a Admisión e o Triaxe, como agora. O PAC terá dúas consultas médicas, unha de enfermería e unha consulta de atención a sospeitas de infección respiratoria. O Servizo de Urxencias contará con dúas consultas polivalentes, unha sala de curas e seis boxes. Deles, un de maiores dimensións para a atención a pacientes críticos e outro, con aseo e espazo previo, para facilitar o illamento de pacientes con sospeita de infección.
O novo edificio hospitalario contará tamén cunha sala de observación 24 horas, sala de traballo médico, sala de reunións, farmacia, sala de pre-alta, despacho de información a familiares, dormitorios de persoal e outros espazos de apoio. E, neste punto, o "horizonte de once meses" para as obras comeza a semellar escaso tendo en conta que inda se está facendo a cimentación. Imos vendo que acontecerá.